印尼17岁小子马杜尼斯, 话畀你听呢个世界系有奇迹。2004年，发生震撼全球嘅南亚大海啸造成超过23万人死亡，住喺印尼亚齐省嘅马杜尼斯，妈妈同兄弟亦因此而丧生，而佢就被捲走，于怒海中飘浮咗21日，期间靠食面维生，最终佢飘到去沙滩而执番条命。当佢被记者包围，问佢飘浮嗰阵惊唔惊，着住老翻葡萄牙10号波衫嘅佢就话：「我唔惊，因为我要见番家人，同埋第时要做个职业足球员!」
佢呢番话，感动到无数葡萄牙人，当中包括C朗。C朗之后唔单止成日见马杜尼斯，仲出钱帮呢位小朋友起屋重建家园，而葡萄牙国家队，甚至系时任国际足协会长白礼达亦都有接见呢位海啸幸存者。
几年过去，马杜尼斯依家已17岁，葡超球队士砵亭宣布签入呢位小将，畀佢喺青年军都磨练。大家都知C朗曾经効力士砵亭，马杜尼斯话对佢别有意义：「我真系好开心，士砵亭令我梦想有机会成真，我好多谢球会，亦都好多谢C朗!」
评论 (0)