家族亲戚关係称呼表〔广东话版〕
喺中国人嘅文化入面，〔亲戚〕或者〔亲属〕，係指因为有〔婚姻〕或者〔血缘〕同人类个体连成嘅社会关係，父母、兄弟姊妹等等嘅〔亲属〕又叫〔亲人〕或者〔家人〕，其他嘅就叫做〔亲戚〕。
亲属关係嘅记录最早係先秦嘅典籍尔雅第四章嘅〔释亲〕。古代唐朝学者孔颖达对亲戚嘅注解係〔亲指族内，戚言族外〕，所谓〔族内〕係指父系同宗嘅人，以男性为中心，包括宗族内嘅男性同佢哋嘅配偶，但係唔包括已经出嫁咗嘅女性同佢哋嘅配偶。
喺依家嘅人就多数分为〔血亲〕、〔姻亲〕同〔配偶〕。
＊〔血亲〕
〔直系血亲〕
〔鼻祖〕－〔始祖〕始创人。
－係祖宗十八代嘅嘅第一代。
〔远祖〕－〔始祖〕接班人。
〔太祖〕－〔係指曾祖嘅曾祖嘅父母〕。
〔列祖〕－〔列祖列宗〕，就係呢一个嘞！
〔天祖〕－〔係指阿爷嘅阿爷嘅父母〕。
〔高祖〕－〔父系〕太太爷，太太嫲〔高祖父母〕。
－〔母系〕太太公，太太婆〔外高祖父母〕。
太爷〔曾祖〕－〔父系〕太爷，太嫲〔曾祖父母〕。
－〔母系〕太公，太婆〔外曾祖父母〕。
阿爷〔 祖〕－〔父系〕阿爷／爷爷，阿嫲／嫲嫲〔祖父母〕。
－〔母系〕阿公／公公，阿婆／婆婆〔外祖父母〕。
阿爸〔父亲〕－老窦，老头子，爸爸，爹哋。
阿妈〔母亲〕－老母，老妈子，妈妈，妈咪。
阿仔〔儿子〕－父母之下男性嘅第一代。又叫〔仔〕、〔囝〕。
阿女〔女儿〕－父母之下女性嘅第一代。又叫〔女〕、〔囡〕。
孙〔孙儿〕－父母之下男女嘅第二代。
依性别又分〔孙仔〕、〔孙女〕。
有时候〔孙〕係一种唔分性别嘅称呼。
息〔曾孙〕－父母之下嘅第三代。
广东话通常读〔室〕，又叫〔重孙〕。
〔玄孙〕－父母之下嘅第四代。
〔来孙〕－父母之下嘅第五代。
〔昆孙〕－父母之下嘅第六代，又叫〔晜孙〕。
〔仍孙〕－父母之下嘅第七代。
〔云孙〕－父母之下嘅第八代。
〔耳孙〕－父母之下嘅第九代。
〔旁系血亲〕
〔父系长辈〕
阿伯〔伯父〕－仔女对阿爸嘅阿哥嘅称呼。
大哥叫〔大伯〕，二哥叫〔二伯〕，三哥叫〔三伯〕...
阿姆〔伯母〕－仔女对阿伯嘅老婆嘅称呼。
通常叫〔伯娘〕，又有分〔大伯娘〕，〔二伯娘〕，〔三伯娘〕...
阿叔〔叔父〕－仔女对阿爸嘅细佬嘅称呼。
通常叫〔叔叔〕，又有分〔二叔〕，〔三叔〕...〔细叔〕。
阿婶〔婶母〕－仔女对阿叔嘅老婆嘅称呼。
通常叫〔婶婶〕，又有分〔二婶〕，〔三婶〕...〔细婶〕。
阿姑〔姑姑〕－仔女对阿爸嘅姐妹嘅称呼。
姐姐叫「姑妈」，妹妹叫「姑姐」。
姑丈〔姑父〕－仔女对姑妈同姑组嘅老公嘅称呼，都係一样咁叫法。
〔母系长辈〕
舅父〔舅舅〕－仔女对阿妈嘅兄弟嘅称呼。
又有分〔大舅父〕，〔二舅父〕，〔三舅父〕...〔细舅父〕。
如果佢嘅年纪比自己细嘅就叫〔舅父仔〕。
妗母〔舅母〕－仔女对舅父嘅老婆嘅称呼。有啲人会叫〔舅妈〕。
阿姨〔姨姨〕－仔女对阿妈嘅姐妹嘅称呼。
姐姐叫〔姨妈〕，妹妹叫「阿姨」或者〔姨姨〕。
姨丈〔姨父〕－仔女对姨妈同阿姨嘅老公嘅称呼。都係一样咁叫法。
〔同辈〕
亲〔兄弟姐妹〕－仔女对父母嘅仔女嘅称呼。又叫〔兄弟姊妹〕。
係指有相同〔父亲〕同〔母亲〕嘅人。
堂〔兄弟姐妹〕－仔女对父系旁系血亲长辈〔伯、姆、叔、婶〕仔女嘅称呼。
有啲地方喺讲嘢同介绍嘅时候係唔讲个「堂」字。
表〔兄弟姐妹〕－仔女对父系旁系血亲长辈〔姑〕仔女嘅称呼。
对母系旁系血亲长辈〔舅、妗、姨〕仔女嘅称呼。
〔晚辈〕
侄 〔仔女〕－兄弟对兄弟嘅仔女嘅称呼。
男嘅叫〔侄仔〕，女嘅叫〔侄女〕。
姪 〔仔女〕－姐妹对兄弟嘅仔女嘅称呼。
男嘅叫〔姪仔〕，女嘅叫〔姪女〕。
外甥〔仔女〕－兄弟对姐妹嘅仔女嘅称呼。
男嘅叫〔外甥〕，女嘅叫〔外甥女〕。
姨甥〔仔女〕－姐妹对姐妹嘅仔女嘅称呼。
男嘅叫〔姨甥〕，女嘅叫〔姨甥女〕。
＊〔姻亲〕
家公〔公公〕－老婆对老公嘅阿爸嘅称呼。
又叫〔家翁〕，有时直叫〔阿爸〕，有啲地区又叫〔老爷〕。
家婆〔婆婆〕－老婆对老公嘅阿妈嘅称呼。
又叫〔家姑〕，有时直叫〔阿妈〕，广东地区又叫〔奶奶〕。
外父〔岳父〕－老公对老婆嘅阿爸嘅称呼。
有时直叫〔阿爸〕或者〔嗲哋〕。
外母〔岳母〕－老公对老婆嘅阿妈嘅称呼。
有时直叫〔阿妈〕或者〔妈咪〕。
新妇〔媳妇〕－父母对阿仔嘅老婆嘅称呼。
广东话通常係读〔新抱〕或者〔心抱〕。
女婿〔女婿〕－父母对阿女嘅老公嘅称呼。
阿嫂〔兄嫂〕－细佬细妹对阿哥嘅老婆嘅称呼。
大哥嘅叫〔大嫂〕，二哥嘅叫〔二嫂〕，三哥嘅叫〔三嫂〕...
弟妇〔弟媳〕－阿哥家姐对细佬嘅老婆嘅称呼。
姐夫〔姊夫〕－细佬细妹对姐姐嘅老公嘅称呼。
大姐嘅叫〔大姐夫〕，二姐嘅叫〔二姐夫〕，三姐嘅叫〔三姐夫〕...
妹夫〔妹婿〕－阿哥家姐对妹妹嘅老公嘅称呼。
〔妯娌〕
妯娌係兄弟嘅老婆之间嘅互相称呼或者合称。
辈份大嘅妯娌会直接叫细嘅妯娌嘅名，对外人介绍就讲：佢係我嘅〔细婶〕；辈份细嘅妯娌会称呼大嘅妯娌做〔阿嫂〕或〔大嫂〕，对外人介绍就讲：佢係我嘅〔阿
嫂〕。
〔连襟〕
连襟係姐妹嘅老公之间嘅互相称呼或合称。
又叫〔襟兄弟〕、〔连桥〕，广东人多数合称叫〔老襟〕。
大伯〔大伯〕－对老公嘅哥哥嘅称呼。
叔仔〔小叔〕－对老公嘅弟弟嘅称呼。
姑奶〔大姑〕－对老公嘅姐姐嘅称呼。
姑仔〔小姑〕－对老公嘅妹妹嘅称呼。
大舅〔内兄〕－对老婆嘅哥哥嘅称呼。
舅仔〔内弟〕－对老婆嘅弟弟嘅称呼。
大姨〔姨姐〕－对老婆嘅姐姐嘅称呼。
姨仔〔小姨〕－对老婆嘅妹妹嘅称呼。
〔继亲〕
继亲都係亲属嘅一种，係是指生父同生母离异或者父母其中一个死咗之后，仔女跟住其中一个，而佢再结婚嘅配偶对于仔女嘅关係就係叫〔继父〕或〔继母〕。
〔继父〕－又叫〔后父〕或〔晚爹〕，俗称〔后抵公〕。
〔继母〕－又叫〔后母〕或〔晚娘〕，俗称〔后抵乸〕或〔后仔乸〕。
〔继子〕－又叫〔后仔〕，俗称〔油瓶仔〕或〔油艇仔〕。
〔继女〕－又叫〔后女〕，俗称〔油瓶女〕或〔油艇女〕。
〔继兄弟姐妹〕－係〔继父／母〕同〔生父／母〕喺结婚之前同其他人所生嘅仔女。
俗称〔拖油瓶〕或〔拖油艇〕，基本係冇直接血缘关係嘅。
而之后所生嘅仔女就叫〔同异／父母〕嘅兄弟姐妹。
例如係：〔同父异母〕嘅哥哥，〔同母异父〕嘅妹妹。
＊〔配偶〕
配偶係指婚姻关係、民事结合、同居伴侣关係、普通法婚姻之中嘅伴侣。呢啲係个冇特定性别嘅词，通常男性配偶叫做〔丈夫〕、女性配偶叫做〔妻子〕。所以，呢个词无论係多元性别或者係单元性别嘅异性关係或者同性关係，都可以适用。一对夫妻通常会係一齐生活，一齐养育仔女，组成为一个家庭单位嘅。
老公〔丈夫〕－结咗婚嘅女人对自己伴侣嘅称呼。
近代多数叫〔先生〕，〔老公〕。
传统嘅就叫〔相公〕、〔官人〕、〔夫婿〕、〔夫君〕等。
但係有人亦唔锺意用呢个称呼，因为喺清朝嗰时， 喺京城嗰啲妓女对啲太监〔公公〕嘅蔑称做〔嫪公〕。
老婆〔妻子〕－结咗婚嘅男人对自己伴侣嘅称呼。
有啲地方叫〔太太〕，近代多数叫〔老婆〕。
传统嘅就叫〔娘子〕、〔夫人〕。
＊〔其他〕
〔契亲〕契亲家
契亲又叫〔乾亲〕，或俗称〔契字辈〕，係一种人际关係，结契亲、拜契亲又叫〔上契〕、〔结谊〕。「谊」係指情谊，「契」係指契约，係指两个或以上冇血缘关係嘅人结为一种拟似亲属嘅关係，彼此之间用亲人嘅感情维繫，可以係长辈同晚辈，又可以係同辈。通常都係友上加亲嘅居多，亦友亦亲，关係比一般嘅远亲同一般嘅朋友更密切，同辈嘅结契又叫做〔结拜〕、〔结义〕、〔换帖〕等。
契爷〔乾爹〕－又叫〔契爸〕；〔乾爸〕或者〔乾爷〕
契妈〔乾娘〕－又叫〔契娘〕，〔乾妈〕一般都係契爷嘅老婆
契仔〔乾儿〕－
契女〔乾女〕－
契哥〔乾哥〕－
契姐〔乾姐〕－
契妹〔乾妹〕－
契弟〔乾弟〕－喺香港，冇乜人想畀人咁叫，如果叫〔契细佬〕就会好啲啲
〔过继〕
过继又叫做〔过房〕、〔过嗣〕，係传统宗族观念入面嘅一种〔收养〕行为。大多数係为咗延续男性继承人而做嘅。当一个家庭需要后嗣嘅时候，就喺宗族或者其他亲属入面，收养一个仔或女，用嚟维持祭祀香火或者男性继承人。就算呢个男性无仔送终，家族仍然可以为佢选一个嗣子，做成亲生仔嘅关係。有啲地方生咗细路仔难养〔多病等〕，都会搵个〔人〕或〔神明〕嚟过继〔形式上〕，认为咁样个细路就会好养啲。
过继〔达〕－或者直叫〔爸、爹〕等
过继〔娘〕－或者直叫〔妈、娘〕等
过继〔儿〕－
过继〔女〕－
〔收养〕
收养又叫〔抱养〕、〔领养〕，係指将人哋嘅仔女收嚟做自己嘅仔女。法律上，收养视同婚生子女嘅一种身分契约关係。由于收养会将本身冇真实血缘联係嘅人，拟制具有亲生仔女关係，所以收养人同埋被收养人之间又叫做〔法定血亲〕或者〔拟制血亲〕。收养人叫做〔养父〕或〔养母〕，被收养人就叫做〔养子〕或〔养女〕；被收养人嘅生父母叫做〔本生父母〕，而对本生父母嚟讲，被收养人叫做〔出养子女〕。仔女出养之后，本生父母嘅亲权即处于暂时停止嘅状态。
养父〔义父〕－
养母〔义母〕－
养子〔义子〕－
养女〔义女〕－
祖宗十八代
〔十八代〕一般係指父系之中上下九代嘅宗族成员。之后，亦畀人引伸加入闹人嘅用语入面，将人哋嘅家族成员都牵涉当中，用语嘅起源都已经无从稽考。
上九代依序係：
＊係祖宗十八代嘅嘅第一代。
〔鼻祖〕－子女以上嘅上九代。
〔远祖〕－子女以上嘅上八代。
〔太祖〕－子女以上嘅上七代。
〔列祖〕－子女以上嘅上六代。
〔天祖〕－子女以上嘅上五代。
〔高祖〕－子女以上嘅上四代。
〔曾祖〕－子女以上嘅上三代。
〔 祖〕－子女以上嘅上二代。
〔父母〕－子女以上嘅上一代。
下九代依序係：
〔儿女〕－父母之下嘅第一代。
〔 孙〕－父母之下嘅第二代。
〔曾孙〕－父母之下嘅第三代。
〔玄孙〕－父母之下嘅第四代。
〔来孙〕－父母之下嘅第五代。
〔晜孙〕－父母之下嘅第六代。
〔仍孙〕－父母之下嘅第七代。
〔云孙〕－父母之下嘅第八代。
〔耳孙〕－父母之下嘅第九代。
＊係祖宗十八代嘅嘅第十八代。
中文亲属称呼同英文亲属称呼
中文嘅称谓比较细緻，英文嘅称呼就好简单，举个例嚟讲：Aunt 可以表示〔婶婶〕、〔伯母〕、〔舅母〕、〔姑组〕、〔姨妈〕；Uncle 可以表示〔叔叔〕、〔阿伯〕、〔舅父〕、〔姨丈〕、〔姑丈〕。
中文嘅称谓係为咗区分内外同表裡，比如係：
「堂」亲，例如〔堂兄、堂弟〕，係同姓家属，係近亲，係家族裡面嘅人；「表」亲，例如〔表哥、表弟〕，係异姓亲属，係远亲，係家族外面嘅人；「内」亲，例如〔爷爷、嫲嫲〕，係同族近亲，你阿爸呢边嘅人，係家族裡面嘅人；「外」亲，例如〔外公、外婆〕，係异族远亲，係阿妈嗰边嘅人，係家族外面嘅人。
英文嘅称谓系统逢係唔做呢样嘅区分
Grandfather 既可以表示〔爷爷〕，又可以表示〔外公〕；Cousin 既可以表示〔堂兄、堂弟〕，又可以表示〔表哥、表弟〕。所以由英语嘅称呼上睇唔出远近同表裡，睇唔出亲疏关係。
喺古代嘅家族入面，通过称谓，就可以确定一个人喺家族裡头嘅地位同身份，所享有嘅权利同要尽嘅义务，呢样要各人守好自己嘅本分，有利于家族嘅管理，有利于儒家等级制度嘅实施。
而西方人嘅等级观念同等级制度就冇东方人咁複杂，所以表现喺称呼上面亦都冇咁複杂同细緻。
译：萧南仁．2014年11月
係佢错定我错呢？
我一直以为，同姓氏先用〔叔伯姑婶〕，唔同姓就用〔舅姨〕！但佢果表，阿嫲既兄弟姐妹既仔女，居然用〔叔伯姑婶〕！？疏到唔疏喎！
资料修正：
图中〔阿嫲〕嘅兄弟姐妹嘅仔女一组，错用〔叔伯姑婶〕称呼，正确嘅称呼应该同阿婆嘅兄弟姐妹嘅仔女一组相同！
评论 (0)