艺人杨爱瑾（Miki）与拍拖八年的永安太子爷郭永淳于去年4月拉埋天窗，婚后火速造人成功！
去年11月份，Mik喺微博留言暗示有喜，并说：「Hey little thing，you，make us go wild！」大槪意思是指小东西，你令我们开心得疯了！而观乎杨爱瑾上载同老公嘅合照，佢哋两个好似大细路咁做晒鬼脸，Miki仲要好调皮咁用手揿实老公块脸，恩爱度爆晒灯。
去年12月，Miki与老公郭永淳出席无国界医生电影节开幕礼，是Miki宣布有喜后首次公开露面，她身穿白色松身衫，不时用手袋遮肚。之后两人受访，但全程都是Miki回答问题，老公就在她身边守护着，认真恩爱。
问到怀孕几个月？Miki避谈笑言：「几个月，过咗三个月。（预产期几时？）下年，农历新年后啦。」问到可有害喜现象？她谓：「之前有好唔舒服，大约两、三个月冇出街，不过我唔系呕，系好唔舒服，成日晕，试过有次差啲喺屋企晕低。（饮食方面呢？）都OK，食得好开心。」而问到知不知道BB性别？她谓：「我哋知道，但想留番做我哋之间嘅秘密，迟啲先讲，有个Surprise。」
不过，养紧胎嘅Miki，间中都有喺社交网站Po下相，早前佢上载咗张同爱犬嘅合照，网友就见到Miki明显比之前圆润。佢留言话：「我有块福气面，圆咕碌。」睇张相佢个鼻望落去仲好似大咗，连好朋友兼余文乐绯闻女友朱韵韵都有留言话：
「大鼻」坊间流传孕妇怀男胎个鼻会变大。连网民都纷纷留言问佢系咪佗仔，莫非Miki真系一索得男？
依家怀孕7个月嘅Miki行动仍然非常敏捷，一啲都冇孕味。上个月Miki就喺微博上载咗三张好有动感嘅相，着住条黑色长裙，间条外套嘅Miki，少女味十足，净系见到少少肚凸凸，佢攞住一大扎气球好开心咁周围跑同上落楼梯，可以话佢系「最活泼孕妇」呀！
而且，向来悭家的Miki斋睇唔买，曾经佢就被媒体拍到进入名店后没多久，便步入了附近超市购买了大条面包便往付款。肚凸凸的Miki离开时虽然一脸疲态，但悭到尽的杨爱瑾宁愿往排队等小巴，亦没有做「伸手党」搭的士。
昨晚，腹大便便的Miki再次被拍到与老公结伴行中环，佗B的她明显面圆圆，一向纤幼的小腿亦开始有些水肿，只见两公婆买了大一堆日用品及健康食品，埋单后老公主动帮手孭起Cute到爆的公仔环保袋，继而拖实老婆离开。
Miki和老公入完货随即行去附近小巴站，眼见人龙不长，郭永淳忽然加快步伐，一支箭冲向前去排队，被撇低在后的Miki即时大表不满，鼓起泡腮向老公诈娇，郭永淳识做地认低威，落力凼番老婆，两人耍完一轮花枪，继续一向的悭家作风，搭小巴回家休息。
真希望Miki同郭永淳能幸福
评论 (0)